1

اضراب 6 ابريل بدا ناجحا بسبب التوتر الامنى اللى عملته الداخلية قبله باصدار بيانات عن احتمال وقوع اعمال شغب فمعظم الناس اللى قعدت فى البيت قعدت عن حذر و خوف و ليس عن اقتناع عن دعوة الاضراب بالفعل و ده ما يمنعش ان فيه ناس قعدت فى البيت عن اقتناع لان الناس كانت مكبوتة و محتاجة اى حاجة تنفس بيها عن نفسها لكن النسبة الحقيقية للمتضامنين مع الاضراب بالفعل لم تكن كما بدا لنا كما ان احداث المحلة ابدت صبغة نجاح على يوم 6 ابريل.... و حماسنا و فرحتنا باللى حصل صور لنا ان ده فعلا نجاح حقيقى للاضراب ..كل العوامل دى ادت لتسليط اضواء الاعلام اكتر علينا و فى ناس فرحت بنفسها و صدقت نفسها للاسف و ده شىء طبيعى انه حصل

2

بعد اضراب 6 ابريل و زيادة تسليط الاضواء على شباب الفايس بوك و اعتقال بعض منهم على خلفية 6 ابريل بدات الحكومة تفكر فى التعامل مع الشباب دول ازاى لانها حست انهم ممكن يعملوا حاجة اشد فى 4 مايو فبدأ الهجوم الاعلامى و تشويه صورة هؤلاء الشباب فى وسائل الاعلام الحكومية و اولها الصحف القومية مما ادى لاضفاء صورة سلبية عند الناس عن الاضراب و اهدافه و هل هو قانونى و لا لأ و كل اللغبطة دى و مع حقيقة اننا شعب سمعى لايقرأ غالبا و ما بيوجعش دماغه بالتفاصيل و مع جو السلبية الى تم خلقه اعلاميا حول الاضراب فبالتالى الناس العادية لم تصبح متحمسة ناحيته بالاضافة لبعض الضربات الاستباقية مثل الزيادة الغير مسبوقة فى نسبة العلاوة اللى طرحها الرئيس فى عيد العمال و اللى مش عارفين لغاية دلوقتى الحكومة هتيجبلها موارد منين و ممكن الحكومة متلاقيش موارد و تطلع مزاولة من الريس لكن مش ده المهم..المهم ان توقيت اعلان ده قبل الاضراب بيومين قام بعملية تفريغ كبت لناس كتير من عامة الشعب و هو نفس الكبت اللى خلاهم يشاركوا و لو على استحياء فى اضراب 6 ابريل مما ادى لتراجع الكثير و فتور حماسه تجاه اضراب 4 مايو

3

لم تكتفى الحكومة بكده و بس بل قامت بتجنيد من اندس بين الشباب على الفايس بوك و لعبت ببراعة سياسة فرق تسد و شغل اعضاء الجروب فى مهاترات جانبية استهلكت الوقت و المجهود بالاضافة لجو من التوتر حول النقاشات بين الاعضاء و تبادل الاتهامات بمجرد ظهور اى لمحة اختلاف فى الراى مما ادى لخلق جو سلبى على الجروب بالذات فى الايام الاخيرة قبل اضراب 4 مايو

4

انضمام حركات و احزاب سياسية للاضراب فى المرة الثانية و فى اللحظات الاخيرة رغم عدم حدوث ذلك فى المرة الاولى كان له اثر سلبى ايضا لان الدافع من وراء هذا الانضمام كان دافع استغلالى سياسى محض

5

عدم وصول الدعوة بقوة كافية للناس فى الشارع رغم المجهود المبذول من ناس كتير و ذلك لعدة عوامل منها ضيق الوقت بين الاضرابين و ظن الداعين للاضراب ان الناس عارفة كل حاجة و كل الناس بتتكلم عن الاضراب بقوة دفع نجاح الاضراب الاول اللى اصلا لم يكن نجاحه حقيقى و بالتالى كانت الناس عارفه ان فى اضراب و لكنها هل مقتنعة بيه و لا لأ؟ هلى عارفه مطالب الاضراب بوضوح كافى؟ هلى الناس عارفه بوضوح البدائل المطروحة للاضراب للتعبير عن الاحتجاج السلمى مثل ارتداء السواد و رفع علم مصر فى الشرفات؟ الاسئلة دى كلها لم يتوقف احد من الداعين للاضراب ليسألها لنفسه مكتفين بان الناس كلها بتتكلم عن الاضراب ..طب و بعدين؟

6

فكرة الاضراب نفسه غير مناسبة لثقافة الشعب المصرى كله ..ممكن مناسبة لقطاع معين منه فى ظروف معينة زى عمال المحلة مثلا لكن جعل كلمة اضراب عنوان لفعل يعبر عن احتجاج من كل طوائف الشعب بلا اسثناء لم يكن اختيار موفق من صاحب الدعوة و كان من الافضل استخدام كلمات اخرى مثل احتجاج عام و لقد تناولت هذه النقطة بالتفصيل قى بوست سابق بعنوان "عن الاضراب و سنينه" و الافضل للرجوع له لفهم هذه النقطة بالتفصيل

كل العوامل السابقة كانت مسببة لما حدث "او بمعنى اصح لما لم يحدث" اليوم

بعد اليوم من الصعب جدا على مجموعة شباب الفايس بوك تكرار الدعوة لشىء على الارض بحجم الاضراب العام لان الكثير سيصابوا بالاحباط و ينسحبوا بالاضافة لان الاعلام مش هاسيبنا فى حالنا و هيستلمونا

و لكن هلى معنى ده كله ان ماحدث منذ الدعوة لاول اضراب يوم 6 ابريل لغاية النهاردة فى المحصلة شىء سلبى؟

الاجابة و بالفم المليان: لا طبعا المحصلة حتى اليوم ايجابية و نجاح لنا كلنا و اليك الاسباب

1

احنا نجحنا فى توصيل صوتنا و اننا نلفت نظر الناس كلها و نلقى طوبة فى بحيرة ماء راكدة و نحسس الحكومة هى قد ايه هشة و ضعيفة لدرجة تجعلها تجند مخبريها و عملائها للدخول على الفايس بوك و محاولة الكلام مع اى شاب من شباب الفايس بوك و لو على الشات للحصول على اى معلومة

2

الوعى بتاعنا زاد و لو نسبيا و بدأنا نتواصل مع بعض و نشغل دماعنا لطرح افكار ممكن تساعد البلد فى النهوض و ده فى حد ذاته شىء ايجابى و لا يقدر بثمن مع الاخذ فى الاعتبار عدم قدرتنا على التواصل من قبل فى اى صورة مدنية او سياسية سلسة لمحاصرة الحكومة لكل ده امنيا و سياسيا و الاغتيال السياسى اللى بتقوم الحكومة بيه لكل الاحزاب الجديدة اللى بتطلع باستخدام سياسة فرق تسد و هى نفس السياسة اللى استخدمتها فى الايام الاخيرة مع اعضاء الجروب و لكن للاسف فى حياة الاحزاب بيكون اللعب على المكشوف بشراء اشخاص حقيقين بالكامل و ليس بشخصيات افتراضية كما فعلت معنا على الانترنت

طب عرفننا ان التجربة ايجابية و اننا ممكن نأثر طب ماذا بعد ؟ ممكن تبقى ايه الخطوة اللى جاية؟

فى ضوء اللى حصل خيرا و بواقعية شديدة ..صعب الاستمرار فى الدعوة عن طريق الانترنت و الفيس بوك فقط لشىء كبير يحدث على الارض يكون كل الاعداد له و الترتيب له على الانترنت فقط .. مكن نعتبر الانترنت و سيلة مساعدة لمناقشة الافكار ووضع اللمسات النهائية لكنه لا يكون هو المحرك الاساسى للحدث ..ممكن نستخدمه لطرح افكار و حلول و مناقشتها بينا و بين بعض ..ممكن نستخدمه للدعوة لحاجات معقولة و واقعية ممكن ننفذها على الارض لكن لا يمكن ان يكون نقطة انطلاقنا لاى شىء كبير يفرق معانا و مع البلد بجد هو الانترنت فقط بدون اعداد مسبق طويل الامد على الارض و عن طريق الالتقاء بينا و بين بعض وجها لوجه فى اى اطار تنظيمى

و ده بيقودنا للسؤال المهم اللى هيحدد المستقبل بالنسبة لنا ..ايه هو الاطار التنظيمى ده؟ ..هل هو حزب؟ ..هلى هى جمعية اهلية؟ طب مين اللى هيتولى الاعداد للكيان ده؟..مين هيمول الكيان ده؟

كل دى اسئلة هتواجهنا لو قررنا اننا ننقل الكيان بتاعنا ده لشىء على الارض ..الحل ده يبدوا صعب و امكانية تحقيقه بعيدة لانه محتاج حد له خبرة سياسية يتولاها لكنه مش مستحيل ....و هناك حل بديل..اننا نبدأ ندور كل مننا فى مدينته او محافظته عن حزب او جمعية اهلية يتحرك من خلالها مع استمرار اعتبار الجروب مكان نتلاقى فيه لمناقشة الاقتراحات و الافكار و اذا لم ينجح اى مننا فى الانضمام لاى كيان على الارض ..نفضل متجمعين مع بعض على الانترنت نطرح افكار..نطرح حلول لمشاكل ....نعمل حملات توعية..بس المهم نكون واقعيين و منطقيين مع نفسنا فى حجم التاثير اللى ممكن نعمله حتى لانصاب بالاحباط

و اهم شىء لازم نخليه دايما فى بالنا....احنا لم نفشل..... مجرد التقائنا مع بعض و مناقشتنا مع بعض و الاثارة الفكرية اللى حصلت بينا على مر الفترة اللى فاتت كلها ...لفتنا لنظر البلد كلها و خدوا بالهم ان فى مجموعة من الشباب كان بيطلق عليها فيما سبق الاغلبية الصامتة لم تصبح صامتة و انما بتتكلم و كلمتها بتوصل و بتأثر و لو تأثير بسيط..مش لازم ابدا اللى حصل النهاردة يخلينا نحبط او نتراجع...بالعكس نعتبر النهاردة بداية و كأن كل واحد فينا نواة جمعية اهلية او حزب سياسى ...المهم ان الايجابية اللى احنا اصبحنا عليها الفترة اللى فاتت لا تتحول الى سلبية بعد اول احباط يقابلنا و الا يبقى خلاص مافيش امل فى البلد طالما مافيش امل فينا