تررن تررن....ترررن تررررن
بوش:هالو مستر بريزدنت
مبارك:بوش حبيب قلبى عامل ايه..ايه مستر بيزدنت دى..انت مخليها رسمى ليه كده ما تفك شوية
بوش:و الله يا حوس انا مكسوف منك ووشى فى الارض مش عارف اقولك ايه..انا عارف انى قصرت معاك الفترة اللى فاتت لما كنت تعبان بس اعمل ايه... العراق مبهدلانى
مبارك:ولا يهمك يا باشا دى كلها اشاعات..مغرضة الكلاب كل ماتجيلى نزلة برد او كرشة نفس عايزين ينطرونى لكن ابدا
بوش:انت هاتقولى ..ده انت مدوبهم سبعة و عشرين سنة..و بعدين هما هايلاقو زيك فين
مبارك:انت الوحيد اللى فاهمنى يا بوش وماحدش من اللى حواليه مقدر...حتى الولا جيمى ابنى و عايز يورثنى و انا على وش الدنيا..و بعدين ماهى كده كده رايحة له..مستعجل على ايه مش فاهم
بوش (مترددا):و الله انا عايز اقولك حاجة بصراحة بس خايف تفهمنى غلط
مبارك:لا قو ماتخافش انا مديك الامان
بوش:انا راييى انك تريح شوية بقى...وجيمى دلوقتى بسم الله ماشاء الله عليه يحكم بلدين مش بلد واحدة
مبارك(و فى صوته رنة عصبية):انت كمان..مش كفاية اللى فى البيت بيزنو عليا..ايه خلاص سياساتى مابقتش عاجباكوا ولا ايه
بوش (متراجعا):لا و الله ماقدرش اقول كده سياساتك الخارجية و الدولية متزبطة و زى الفل
مبارك(و قد تحولت العصبية فى صوته لغضب):لا يا راجل...انا حاسس فى صوتك برنة تريقة..لا يا حبيبى اسال الروءساء اللى قبلك..انا مزبطهم هما وولادهم و اللى جابوهم...و هانروح بعيد ليه ارفع سمعة التليفون على ابوك و اسأله ... دلوقتى جى تقولى استريح
بوش(خافضا صوته محاول التهدئة): اهدى بس يا حوس انا ماقلتش حاجة و كلنا مقدرين دورك الدولى بس االاوضاع الداخليةعندكوا اليومين دول رايحة فى داهية و الناس ممكن تطنش على السياسة طالما لقمة العيش متوفرة حتى لوكانت لقمة العيش دىمتغمسة بالذل لكن دلوقتى حتى لقمة العيش مش لاقينها
مبارك(صوته يكاد يخرق السماعة):لا بقى ده انت متسلط ..ماتخلينيش اغلط بقى..ماهى امريكا كمان فيها اللى فيها و الناس ليل نهار شغالة تريقة على سعادتك وعلى اخطاء ك اللغوية و بيقطعوا فى فروتك فى كل مناسبة
بوش:ايوا يا حوس بس على الاقل الناس عندى عارافة ان انا كده كده ماشى اخر مدتى..مش هاطبق على ماراوحهم ومراوح احفادهم
مبارك(صوته خرق السماعة خلاص): قصدك ايه بالظبط
بوش: لا انا اكلمك و قت تانى تكون هديت شوية....دى مش طريقة كلام
مبارك: سلام
ترك....صوت السماعة يغلق بعنف
بوش بعد ان اغلق السماعة التفت للشخص الجالس امامه و لم ينطق بكلمة طول المكالمة
بوش:ابوك بقى عصبى قوى يا جيمى
جيمى:معلش انت عارف بقى السن له حكمه و بعدين ماتحاولش تناقشه كتيير
بوش:امال انت بتعمل ايه معاه
جيمى(و على شفتيه ملامح ابتسامة):لا بقى ده سر الصنعة يا مستر بوش و بعدين انتو ليكوا النتيجة
بوش:ايوا بس الوضع عند كوا بقى خطير..الناس خلاص و اذا استمرت كده ما تقدرش تتوقع اى رد فعل منها
جيمى :ما تقلقش خالص و عامة....هانت خلاص
بوش:تفتكر
جيمى يبتسم و لا يرد
12 لو عندك رأى اكتبه:
هههههه...حلوة قوي...انت سارق الخط من البيت الابيض ولا ايه!؟
:DDD
لا....
خبيث جداااا
والله مش بعيد يا هش
كله جايز
تصدق اني صدقت
بيتر يا سورص
I'm new to your blog , so I don't know if you are the one who publishes the videos of amr adeeb on youtube ,,,,,, I'm requesting if possible that you also get us the videos for Lamees el Hadidi's new program. I'd be really greatful. I recently moved to the USA and find it hard to follow up "el balawee" elley fee masr! Will be comming back to your blog insha'Allah.
أيه ده يا راجل بس
مش عيب لما تراقب خط التليفون
أسلوبك رائع جداً
تحياتي لك
بالراحة على الريس
هو مش مستحمل كلمة
ده بيتكلم عنك كويس
جميل اوي ...
هههههههههههههه
بس كده معاه حق حسني جمل بالطريقة دي ولد عاق
ولازم شيخ الازعر يطلع يفتي فتوه انه هيدخل النار ...
دمت بكل ود...
خالص تحياتي
marvel:
شكرا يا باشا
الجقيقة انا سارق الخط من قصر القبة مش من البيت الابيض
aardvark:
اعوذ بالله من الخبث و الخبائث
ده احنا غلابة يابا
7am7ol amsy:
كله جايز ياباشا و كله ماشى
بيتر:
مرسى على التعليق ياباشا و الف مبروك
phobos:
yes,it's me
thanks for your visit and comment and will try to do my best on the youtube
مدونة تحت العشرين:
مرسى يا فندم على التعليق و الزيارة و الصراحة بقى مراقبة خط التليفون بتاع الريس مش عيب و بعدين اساسا كل المكالمات الرئاسية فى الدول المحترمة بيتم تسجيلها كوثيقة تاريخية صحيح ما بيتمش اتاحتها للنشر الا بعد فترة زمنية طويلة لكن فى النهاية بتتعرض للناس اما احنا بقى فى مصرنا المحروسة فلا يوجد سبيل امامنا الا تخيل هذه المكالمات
solom:
لا يا راجل
هو قال عنى ايه الراجل ده؟
osama:
لا و انت الصادق
شيخ الازهر عامل حساب المستقبل و عايز برضه يورث المشيخة لابنه عشان كده توقع فى اى وقت تطلع فتوى منه بان التوريث حلال حلال حلال
سلام عليكم...
هي دي اول مرة ليه هنا...
بجد مدونتك رائعة
بس انا نفسي اسألك سؤال
انتا علي طول في بيتكو..ولا احيانا بتبيت كضيف شرف في بيت اكرم ناس في مصر..الحكومة يعني...
ولا مادام الموضوع كله كلام و بنقوله ...يبقي نكلم براحتنا.؟
ها
نتكلم؟.؟
ربنا معاك يا ريس
jasmine:
اهلا بيكى ياستى فى المدونة
اما بالنسبة للمكان اللى ببات فيه فانا حاليا الحمد لله ببات فى بيتنا و ربنا يجعل كلامنا خفيف عليهم
بصيت على الروفيل بتاعك و لقيت لسه مالكيش مدونة ياللا شدى حيللك و نقرالك اول بوست قريب طبعا
Post a Comment