اما البوست الحالى اللى حضرتك بتقراه... فهو مجرد توابع ..اعتبره واحد دايخ من القفا المتين اللى خده ..دايخ و شايف النجوم فى عز الضهر .. بيهلفط و بيقول كلام متلخبط و داخل فى بعضه
------------------------------------------------------------
منذ صدمة فشل الاضراب الذريع و الذى اعقبه و بلا هوادة قفا ارتفاع الاسعار المتين و الواحد مازال يترنح (حلوة يترنح دى) من هول الصدمة
من قبل الاضراب الثانى و انا كنت متحمس جدا لمطالب الاضراب رغم تحفظى على مسماه و الطريقة اللى بيعلن بيها عن نفسه ..لكن قلت اهو حاجة نعبر بيها عن نفسنا و نفرغ الكبت اللى احنا حاسيين بيه و نثبت حالة اننا لسه فينا النفس و ان لسه فى مننا رجى و أمل و من قبل الاضراب و انا بروج له بين الناس اللى حواليا و بحاول اتكلم معاهم عن مطالبه و اهدافه و الناس مكبرة دماغها..و تفضل السلبية الصامتة وانا باضحك على نفسى و اقول بس اكيد يوم الاضراب حاجة تانية
فى الشغل لما لبست اسود يوم الاضراب و طبعا كان شكلى تحفة بين زملاء العمل..انا الوحيد اللى لابس اسود و معلق مطالب الاضراب على المكتب و كل اللى يعدى عليا يبص لى و يضحك "صباحو اضراب يا اتش.." و الشغل عندنا بارتيشنز بعيد عنكم مش مكاتب منفصلة.. يعنى الناس كلها قاعدة مع بعض تقريبا و كانت فضيحة بجلاجل
ماعلينا ...مش ده المهم
المهم ان فى اليوم التالى.. صبيحة نكسة 4 مايو...فى الشغل و بعد ماظهرت على النت بشاير خبر رفع الاسعار السار الذى اعلنه احمد عز باشا كعب الغزال و نفس الناس اللى كانت امبارح بتتريق عليا عشان الاسود اللى كنت لابسه تضامنا مع الاضراب..اللى جاله نوبة ضحك هستيرى ....و اللى بيتكلم بصوت عالى و يقول حراااام و برضه كله بيعدى عليا و انا كنت لسه معلق مطالب الاضراب على المكتب...و زمايلى بيقولوا لى كان معاك حق فى موضوع الاضراب و انا اقولهم ...بعد ايه بقى ماخلاص ..اكلنا القفا المتين
واحد صاحبى معايا فى الشغل بمجرد ما قرا الخبر ..قالى لى: كده بقى اضمن لك و ااكد لك ان هييجى عليك يوم خلال السنة اللى جاية تنزل من بيتكم الصبح بدرى فى جيبك تلاتين جنيه رايح تجيب عيش بس..و ياريت تلاقى
و من اطرف ما قيل كمبررات لقرارات رفع الاسعار الاخيرة على السنة الحكومة و مريديها ان القرارات الاخيرة تهدف الى الاخذ من طبقة القادرين و تعطى لغير القادرين...هذه الجملة السابقة اذا لم تضع اعصابك فى ثلاجة و انت تقرأها و تسمعها ممكن ضغطك يرتفع فى الحال.....لان الحقيقة المؤلمة ان القرارات الاخيرة اثرها الواضح انها تاخذ من الطبقة المتوسطة الجزء الضئيل الذى كان يرفعها من شريحة محدودى الدخل و توزع ما تم اخذه على صاحب النصيب ..و بالتالى فان اللى كان مستور اصبح مش لاقى... و اللى مش لاقى هيفضل مش لاقى...و اللى بيقولوا عليهم قادرين مش هيحسوا بحاجة من اساسه
من بعد فشل الاضراب الاخير و انا اتابع بحزن التخبط و العشوائية واضحة فى جروب الفيس بوك الخاص بالاضراب ..الناس مضروبة على دماغها ..دايخة و مصدومة... و كل واحد بيتكلم فى ناحية... ده غير طبعا عملاء العادلى و شباب الحزب الوطنى الذين يسهرون على كومبيوترات و لا بتوبات الداخلية و الحزب و يلعبون ببراعة ادوارهم القذرة على الجروب.... و اللى زاد و غطى اللى حصل لاحمد ماهر مؤسس الجروب ..الراجل ده دفع تمن وطنيته و حبه للبلد ومحدش اتكلم عنه خالص رغم ان اللى حصل له اشد و اقسى من اللى حصل لاسراء بمراحل
مقولة تتردد بشدة على لسان اصدقائى المغتربين اللى اصبحوا اكتر بكتير من اصدقائى الموجودين فى مصر.. المقولة بتقول: جمال عبد الناصر عمل اتفاقية الجلاء و خرج الانجليز من مصر...السادات عمل انتصار اكتوبر و معاهدة كامب دايفيد و خرج اليهود من مصر....اما مبارك فقد نجح نجاحا منقطع النظير فى تهجير المصريين انفسهم بره البلد
طب ليه الشعب المصرى سايب النظام و الحكومة يلطشوا فيه كده..ليه كل مرة كل ماتبدوا بادرة لان الشعب المصرى يفوق و يتحرك...الحكومة تفـوت عليه الفرصة و تلسعه القفا المتين و هى بتطلع له لسانها و تقوله .. و ضحكت عليك
يقول عبد الرحمن الكواكبى فى مقدمة كتابه..طبائع الاستبداد و مصارع الاستعباد : فوجدتُ أفكار سراة القوم في مصر كما هي في سائر الشّرق خائضةٌ عباب البحث في المسألة الكبرى، أعني المسألة الاجتماعية في الشّرق عموماً وفي المسلمين خصوصاً، إنما هم كسائر الباحثين، كلّ ٌ يذهب مذهباً في سبب الانحطاط وفي ما هو الدواء. وحيثُ إني قد تمحّص عندي أنّ أصل الدّاء هو الاستبداد السّياسي ودواؤه دفعه بالشّورى الدّستورية. وقد استقرَََََّ فكري على ذلك ـكما أنّ لكُلّ نبأ مستقراًـ بعد بحث ثلاثين عاماً... بحثاً أظنّهُ يكاد يشمل كلّ ما يخطرُ على البال من سبب يتوهّمُ فيه الباحث عند النظرةِ الأولى، أنهُ ظفر بأصل الدّاء أو بأهمّ أصوله، ولكنْ؛ لا يلبث أنْ يكشف له التّدقيق أنّه لم يظفر بشيء، أو أنّ ذلك فرعٌ لا أصل، أو هو نتيجة لا وسيلة .فالقائلُ مثلاً: إنّ أصل الدّاء التّهاون في الدّين، لا يلبث أنْ يقف حائراً عندما يسأل نفسه لماذا تهاون النّاس في الدّين؟ والقائل: إنّ الدّاء اختلاف الآراء، يقف مبهوتاً عند تعليل سبب الاختلاف. فإن قال: سببه الجهل، يَشْكُلُ عليه وجود الاختلاف بين العلماء بصورة أقوى وأشدّ... وهكذا؛ يجد نفسه في حلقة مُفرغة لا مبدأ لها، فيرجع إلى القول: هذا ما يريده الله بخلقه، غير مكترث بمنازعة عقله ودينه له بأنّ الله حكيمٌ عادلٌ رحيمٌ... وإنّي، إراحةً لفكر المطالعين، أعدّد لهم المباحث التي طالما أتعبتُ نفسي في تحليلها، وخاطرتُ حتّى بحياتي في درسها وتدقيقها، وبذلك يعلمون أنّي ما وافقتُ على الرّأي القائل بأنّ أصل الدّاء هو الاستبداد السّياسي إلا بعد عناءٍ طويل يرجحُ قد أصبتُ الغرض. وأرجو الله أنْ يجعل حُسنَ نيَّتي شفيع
اذن كما يؤكد لنا الكواكبى ان اصل الداء هو الاستبداد السياسى و لن تقوم قائمة حتى يصبح...و لا مؤاخذة... ديمقراطية و تداول للسلطة و محاسبة للحاكم قبل المحكومين بقوة القانون و طبقا لدستور يعبر بالفعل عن ما اتفق عليه الشعب فيما بينهم..و الى حين يتحقق هذا تظل المقولة القادمة (للأسف) قائمة
الصراحة راحة يا مصر....و احنا ما بنعـرفـش
5 رأيـــــــــك يــــــــهــم:
Post of the day
:)
المصيبة بجد ان الواحد لما بيحاول ان ينبه الناس لمطالبهم يتريقوا عليه ويحسسوه انى جاى من كوكب تانى وبعد مايخادو القفا يرجع يقولك والله كان ليه حق
بس برضه بيبقى كلام وبس على رأى شادية وبعد كده بيرجع جين الخضوع والتكيف مع الامر الواقع يطغى تانى علينا ونرجع ندور فى نفس الدايرة المقفولة
" اللى كان مستور اصبح مش لاقى... و اللى مش لاقى هيفضل مش لاقى...و اللى بيقولوا عليهم قادرين مش هيحسوا بحاجة من اساسه "
بص الجملة ديه هى اجمد حاجة قريتها عن موضوع القفا المتين .. بتلخص الليلة كلها
تحياتى
شوكير باشا:
متشكرين على الدعم و الاضافة عندك فى
Post of the Day
بحب السيما:
ياباش الشعب المصرى شعب غريب جدا و ماتعرفلوش قواعد..قرارات اقتصادية تؤثر فى حياته اليومية و تكويه بنار الغلاء و رغم ذلك لا يحرك ساكنا و لا يبدى اى كرامة فى حين ان اى فتنة عمياء متمثلة فى اختلاف طائفى او مقاطعة بلا وعى او حتى خناقة على ماتش كورة..اى حاجة من الحاجات الهايفة دى ممكن تخرج المواطن المصرى عن شعوره و تخلى صوته يعلى
ما علينا انا حاليا بقرا كتاب طبائع الاستبداد..يمكن افهم
تحياتى
موضوع هايل
ولو ان الواحد وهو بيقراه كان حاسس الوجع فى قفاه
تحياتى ليك
اهو ده عيبه:
القفا مازال معلم فى قفا كل مواطن مصرى و ربنا يستر و تيجى على قد كده و بس لاحسن بيقولوا ان فيه و لا مؤاخذة حزمة قرارات تانية جاية فى الطريق و ساعتها بقى..ولا مؤاخذة برضه هيبقى حاجة تانية غير القفا..حاجة ماقدرش اكتبها احتراما للحياء العام..و ربنا يتولانا برحمته
Post a Comment